Karle eta arropa fabrika | Moda jasangarriaren inguruko antzerki eta parte-hartze esperientzia

Karle eta arropa fabrika dot.-ek sortutako eta BBK-k Fashion Revolution Euskadirekin batera bultzatutako familia ikuskizun murgiltzaile eta parte-hartzailea da. Esperientzia honek modaren industriaren erronkei heltzen die eta esperientzia sortzaile, hezitzaile eta eraldatzaile bihurtzen ditu.

Proiektua Karle eta arropa fabrika

Bezeroa BBK Fundazioa

Inpaktu-eremuak

Eragin soziala
Jasangarritasuna

Zerbitzuak

Narratiba berriak
Aldaketarako hezkuntza
Produktu eta zerbitzuen diseinua

↗Galeria ikusi

Erronka: Ehungintzaren problematika familiei hurbiltzea

Modaren industria planetako kutsatzaileenetakoa da, baina bere eragina urrutikoa eta abstraktua da oraindik familia gehienentzat. BBK-k eta Fashion Revolution Euskadik hurrengo galdetu ziguten: Nola bihur dezakegu arazo global hori haurrentzat gertukoa, ulergarria eta eragingarria den zerbait? Nola aktiba dezakegu ohituren aldaketa diskurtso moralizatzaileetara jo gabe?

Soluzioa: Moda jasangarriaren inguruko familientzako antzerki-esperientzia parte-hartzailea

Umeekin konektatzeko, ez zen nahikoa arazoa azaltzea: ukigarria, zirraragarria eta parte-hartzailea egin behar zen. Ideia horrekin, antzerki-tailerreko esperientzia hibrido bat sortu genuen, familiak errealitate horretara hurbiltzeko istorio original baten bidez, ikusle soilak izatetik aldaketaren protagonista izatera igaroz.

Lehenengo ekitaldia: Karlek bere fabrikako ateak irekitzen dizkigu

Ehungintzak ezkutuan duen eraginaz ohartu da Karle neskatoa, eta etxean bere fabrika sortzea erabaki du. Fabrika horretan ez da arropa berririk ekoizten, baizik eta daukaguna eraldatzen du.

Ugaitz Alegriak eta Itxaso Payak Adrián García de los Ojosen musika originalarekin garatutako antzezlan honen bidez, industriaren problematika aurkezten da eta haurrei fabrika honen parte izateko deia egiten zaie, bi mezu nagusiren bidez:

[1] Arropa jasangarriena dagoeneko baduguna da, eta [2] moda-fabrikarik arduratsuena gure etxean bertan dago.

Bigarren ekitaldia: Argiak pizten dira eta Karleren laguntzaile bihurtzen gara

Obra amaitzean, Karlek fabrikako argiak pizten ditu, eta bertaratutakoak 400 metro koadroko ehun-fabrika handi baten barruan daudela ohartzen dira. Eszenografia murgiltzaileak, eskala handiko muntaketa-kate gisa diseinatuak, arazoaren benetako dimentsioa erakusten duten datu giltzarriak aurkezten ditu.

Une horretan, fabrika martxan jartzen da eta ikusleak ikusle izateari utzi eta laguntzaile bihurtzen dira, ehunak berrerabiltzeko eta birbalorizatzeko teknika desberdinen bidez antzerkira eraman dituzten jantzietako bat eraldatuz.